Кыргызстанда 158 миңден ашык бала мектепке катталды. Бул маалымат 1mektep.edu.gov.kg порталындагы ачык маалыматтарда камтылган.
Анын ичинен 2,3 миң бенефициар катталган. 131 миңден ашык орун акысыз бойдон калууда, анын ичинде 27,4 миң жеңилдиги барлар үчүн катталган.
Буга чейин расмийлер бенефициарлар улуттук коопсуздук органдары тарабынан текшерилерин эскерткен.
Белгилей кетсек, 2-июндан тарта электрондук каттоо иш жүзүндө жашаган жери боюнча (каттоо дарегине карабастан) жүргүзүлүүдө. Ал 15-августка чейин созулат.
12 жылдык билим берүүгө өткөндүгүнө байланыштуу 1 жана 2-класстарды каттоо бир убакта жүргүзүлөт. 2018-жылы төрөлгөн балдар система тарабынан автоматтык түрдө экинчи класска, 2019-жылы төрөлгөндөр биринчи класска коюлат.
2019-жылы төрөлгөн балдар Наристе мектебине 480 сааттык даярдоо программасын бүтүргөн болсо, алар да 2-класска бара алышат. Ал үчүн мектепке чейинки билим берүү уюмдары balalyk.edu.gov.kg электрондук базасына маалыматтарды киргизиши керек.
