Бишкекте 1407 автобус болсо, анын 85и гана кондиционер менен жабдылган. Бул тууралуу Бишкек шаардык комиссиясынын жыйынында Транспорт жана жол-транспорт инфраструктурасын өнүктүрүү департаментинин директорунун орун басары Алмаз Алымбеков билдирди.
Ведомствонун өкүлүнүн айтымында, 153, 61, 35 жана 45-маршруттук каттамдардагы автобустар кондиционер менен жабдылган.
«Автобустарда күн ысып жатат деген арыздар түшүп жатат.Ошондуктан транспорттордо капот жана желдеткичтерди күйгүзүү боюнча айдоочуларга түшүндүрүү иштерин жүргүздүк», — деди ал.
Маалым болгондой, узундугу 6 метр болгон кондиционери бар 500гө чейин жаңы автобустарды алуу пландалууда.
Мындан тышкары, чиновник Транспорт жана жол-транспорт инфраструктурасын өнүктүрүү департаменти жүргүнчүлөрдү күндөн коргоо үчүн автобустун терезелерин караңгылатууга уруксат бербей турганын кошумчалады.
