Быйыл Кыргызстандын эгемендүүлүгүнүн 34 жылдыгын майрамдоо Жалал-Абад шаарында өтөт. Бул тууралуу шаар мэри Тилек Исаев билдирди.
Президент Садыр Жапаров түптөгөн салтка ылайык, Эгемендүүлүк күнүн майрамдоо аймактарды өнүктүрүүгө колдоо көрсөтүү максатында өлкөнүн ар кайсы облус борборлорунда өткөрүлүүдө.
Мэрдин айтымында, Жалал-Абад шаары Түрк мамлекеттер уюмунун алкагында туристтик борбор статусун алганы аймактын маанилүүлүгүн жана бул жаатта анын дараметин баса белгилеген. Эгемендүүлүктүн 34 жылдыгына карата 34 жаңы социалдык жана өнөр жай объектилерин ачуу пландалууда.
Майрамдык программада эл аралык маданий иш-чаралар, улуттук тамак-аштын бет ачары жана көргөзмөлөр камтылган. Түрк дүйнөсү жана башка өлкөлөрдөн да коноктордун катышуусу күтүлүүдө.
